"މީގެ ފަހުން އިރުއޮށްސޭ ގަޑީގައި އަބަދުވެސް ގޭގައި ހުންނާތި. ބައްޕަ މިހެން މިބުނީ ދަރިފުޅަށް ރަނގަޅަކަށް. އެގަޑިއަކީ ބޭރުގައި އުޅެން އެހާ ރަނގަޅު ގަޑި އެއްނޫން." ވަހީދު އާރާއަށް ޝައްކުނުވާނެ ގޮތަށް ވާހަކަދެއްކޭތޯ ބެލިއެވެ. މުދިންބެ ބުނެފައި އޮތީ އިރުއޮއްސޭ ގަޑީގައި އާރާ ގެއިން ބޭރަށް ނުކުތަނުދިނުމަށެވެ. އާރާގެ ފުރާނަޔަށް ގެއްލުމެއް ވެދާނެތީއެވެ.
އަހަރެން ވީ ދެރައިން ދުވެފައިގޮސް ކޮޓަރިއަށް ވަނީމެވެ. އަހަރެންނަށް ކުރެވުނު ކުށްހީއަކީ އަހަރެން ކޮބައިތޯ ބަލަން މަންމަ ނޫނީ ބައްޕަ އަންނާނެ ކަމެވެ. އެކަކުވެސް ނައެވެ. އަހަރެންގެ އެ ކުޑަކުޑަ ހިތުގައި ފުރަތަމަ ފަހަރަށް ރިއްސާލިއެވެ. އެދުވަހު ލޯގަނޑު ކުރީމަތީގައި ހުއްޓިހުރެ އަހަރެންވެސް އަހަރެންގެ ސިފައަށް ބެލީމެވެ. ބެލިބެލިހެން މަންމަ ބުނި ވާހަކަތައް ގަބޫލުކުރެވުނެވެ.
މެންދަމުގެ ހަމަހިމޭން ވަގުތެވެ. ފިނީގެ ތެރެއަށް އާރާ ނުކުމެލީ އެނދުގައި އޮވެ ފުރޮޅި ފުރޮޅި އެއްގޮތަކަށްވެސް ނިދި ނައިސްގެންނެވެ. އުޑުގައިވާ ތަރިތަކަށް ބަލަން އާރާ ހުރީ އޭނާގެ ގޭގެ ދެވަނަ ބައިގެ ބެލްކަނީގައެވެ. އާރާ ތަރިތަކަށް ބަލަން ހުރެ ލަވައެއް ކިޔާލަ ކިޔާލާ ހުއްޓެވެ.
އަހަރެންގެ އުމުރުން އެންމެ އަށް އަހަރުން ފެށިގެން ދިރިއުޅުމުގެ ކަންކަން އަހަންނަށް ދަސްވާންފެށިއެވެ. އަހަންނަކީ އެހާ ނަސީބުގަދަ މީހެއްނޫނެވެ.
